ಸೊಳ್ಳೆಗೆ ಧನ್ಯವಾದ

ಡಬಲ್ ಬಿ.ಹೆಚ್.ಕೆ ಫ್ಲ್ಯಾಟು, ಆರಂಕಿ ಸಂಬಳ, ವೈಟ್ ಕಾಲರ್ ಕೆಲಸ
ಒಂದು ದಿನ ರಾತ್ರಿ ತಣ್ಣನೆಯ ನಿದ್ದೆ, ಬೆಚ್ಚಗಿನ ಕನಸು
ಸುತ್ತಲೆಲ್ಲೋ ಸೊಳ್ಳೆ ಸುಳಿದು ಎಚ್ಚರಾಯ್ತು
"ಥತ್ ಥೇರಿ ನುಶಿಯೇ!" ಎಂಬ ಮೌನಬೈಗುಳದೊಂದಿಗೆ
ಚಂದವೆನಿಸಿದ್ದ ಕನಸಿನ ಅನಿರೀಕ್ಷಿತ ಕೊಲೆಯಾಯ್ತು

ಶಬ್ಧವೇದಿ ವಿದ್ಯೆ ಕರತಲಾಮಲಕವೇನಲ್ಲ
ಆದರೂ ಹೊಡೆಯುತ್ತಿದ್ದೆ ಕತ್ತಲಲ್ಲೇ ಕಣ್ಬಿಟ್ಟುಕೊಂಡು
ಚಪ್ಪಾಳೆ ಸದ್ದಿನೆದುರು ಬಹುಷಃ ಆ ಸೊಳ್ಳೆ ಸದ್ದು ಕ್ಷೀಣವಾಯ್ತು
"ಮುಗಿಯಿತು ಅಧ್ಯಾಯ" ಎಂದು ಮಲಗಿದೆ ಹೊದಕಲೆಳೆದುಕೊಂಡು

ಅರ್ಧಕ್ಕೆ ನಿಂತ ಕನಸು ರಿ-ಓಪನ್ ಆಗಿ ಅರ್ಧ ಎಪಿಸೋಡು ಕಳೆದಿಲ್ಲ
ಡಿ.ಟಿ.ಎಸ್ ಸೌಂಡಿನಂತೆ ಮೂಲೆಯಿಂದೆಲ್ಲೋ ಶುರು ಗುಯ್ಯ್ ಗಾಯನ
ಪಡೆದಿರಬೇಕು ಎಲ್ಲದಕ್ಕೂ ಅಂತಾರಲ್ಲ ಅದು ಖರೆಯಿರಬೇಕು!
ಬಳಿಕ ಶಯನಸುಖ-ಸ್ವಪ್ನದಿಂ ವಾಸ್ತವ ಕೂಪಕ್ಕೆ ಅನಿವಾರ್ಯ ಆಗಮನ

ಕತ್ತಲಲ್ಲೇ ಕೈಯ್ಯಾಡಿಸಿ ಮೊಬೈಲು ಕೈಗೆತ್ತಿಕೊಂಡೆ
ಟಾರ್ಚ್ ಆನ್ ಆಯಿತು, ಮೆಸ್ಸೇಜು-ನೊಟಿಫಿಕೇಷನ್ನು ಬಂದಿರಲಿಲ್ಲ
ಬೆಳಕಿನಲಿ ಬೇಟೆಗಾರನಾದೆ ಆಗ, ಬೇಟೆ ದಿಂಬಿನ ಕಡೆಯೆಲ್ಲೋ ಓಡುತಿತ್ತು
ದಬ್ ಎಂದು ಒಂದು ಬಿಟ್ಟೆ, ಶಬ್ಧ ಬಂತಷ್ಟೇ ಸೊಳ್ಳೆ ಮಾತ್ರ ಸಾಯಲಿಲ್ಲ

ಮಧ್ಯರಾತ್ರಿ ಹತ್ತು ನಿಮಿಷ ಮೊಬೈಲು ಕುಟ್ಟಿದರೂ
ಸ್ವಪ್ನಶತ್ರು ಸೊಳ್ಳೆಯ ಸುಳಿವು ಸ್ವಲ್ಪವೂ ಇಲ್ಲ, ಸದ್ದೂ ಕೇಳುತ್ತಿಲ್ಲ
ಬಹುಷಃ ರಕ್ತಹೀರುವ ಅವಕಾಶವನರಸಿ ಶಿಫ್ಟ್ ಆಗಿರಬೇಕು, ನಮ್ಮಂತೆ
ಇರಲಿ! ಬೇಟೆಯಿಲ್ಲದಿದ್ದರೂ ಕೈ ಬರಿದು ಮಾಡಿ ಮಲಗಲು ಅಡ್ಡಿಯಲ್ಲ

ಥೋ ಥೋ, ಬಹಳೇ ಎಚ್ಚರಾಗಿದೆ; ಕನಸು ಅರ್ಧಮೈಲಿಗೆಲ್ಲೂ ಕಾಣುತ್ತಿಲ್ಲ
ನಿನ್ನೆ-ನಾಳೆಗಳ ಚಿಂತೆ ಬಪ್ಪ ನಿದ್ದೆಗೂ ಅವಕಾಶ ಮಾಡಿಕೊಡುತ್ತಿಲ್ಲ
ಎಡಕೊಮ್ಮೆ-ಬಲಕೊಮ್ಮೆ; ವಿಚಾರ-ಗೊಂದಲ-ಹೊರಳಾಟ-ನಿಟ್ಟುಸಿರು
ಅಂಗಾತ ಮಲಗುವುದು ತಪ್ಪಲ್ಲ;ಬೋರಲಾಗಲು ಹೊಟ್ಟೆ ಹಿಡಿಯುತಿದೆಯಲ್ಲ.

ಇಲ್ಲೇ ಇಲ್ಲ! ನಿದ್ದೆ ಹತ್ತುವುದಿಲ್ಲವೆಂಬುದು ಖಚಿತವಾದಂತಾಯಿತು
ಸೋ, ನವ್ಯಮಾನವನ ಸಹಜಾಂಗದ ಮೊರೆಹೋಗುವುದು ಅನಿವಾರ್ಯ
ಶುರುವಿಗೆ ಗಝಲು-ಭಾವಗೀತೆ-ಎಫ್.ಎಂ-ಗಾನಾ.ಕಾಮ್‍ಗಳ ಸಂಗೀತ
ನಂತರ ಯೂಟ್ಯೂಬಿನಲ್ಲಿ ಸದ್ಗುರು-ಜಿಡ್ಡು-ಓಷೋ-ವಿವೇಕಾನಂದ
ಜ್ಞಾನ-ವಿಜ್ಞಾನ ಜೀವನ ಜಿಜ್ಞಾಸೆ, ಬಾಳಿಗೊಂದಿಷ್ಟು ಸರಳ ಸಂದೇಶ

ಅಜಮಾಸು ಎರಡು ಗಂಟೆಯ ನಂತರ ಚಾರ್ಜಿಗೆ ಹಾಕಲೇಬೇಕಾಯಿತು
ತಲೆಯೊಂದು ಮಟ್ಟಿಗೆ ನೆಟ್ಟಗಾಗಿತ್ತು, ನಿದ್ದೆ ಬರುವ ಸೂಚನೆಯೂ ಇತ್ತು
ಒಂದರಿಂದ ಎಣಿಸಲು ಶುರುವಿಟ್ಟೆ, ಎಚ್ಚರಾಗಿದ್ದು ಅಲಾರಾಂ ಕೂಗಿದಾಗಲೇ
ಹತ್ತು ನಿಮಿಷಕ್ಕೆ ಸ್ನೂಜು ಮಾಡಿ ಬಿದ್ದುಕೊಂಡವನಲ್ಲಿ ಒಂದಿಷ್ಟು ಪ್ರಶ್ನೆಗಳು ಎದ್ದಿತ್ತು

ನಿನ್ನೆ ನಿದ್ದೆಗೆಡಲು ಕಾರಣ ಸೊಳ್ಳೆಯಾ? ನಾನಾ?
ಸೊಳ್ಳೆಯೆಂಬ ಕೀಟ ನಿಜಕ್ಕೂ ಬಂದಿತ್ತಾ? ಭ್ರಮೆಯಾ?
ತಲೆತುಂಬ ಬಿಟ್ಟುಕೊಂಡಿರುವ ಹುಳಗಳೇ ಸೊಳ್ಳೆಯಾದವಾ?

ಹಾಸ್ಟೇಲಿನಲ್ಲಿ ಸೊಳ್ಳೆಗಳೂ ಸ್ನೇಹಿತರಾಗಿದ್ದವು
ಅವುಗಳ ಗುಯ್ಯ್‍ಂಗುಡುವಿಕೆ ಹಿತಸಂಗೀತವಾಗಿತ್ತು
ವಯಸ್ಸಾದಂತೆ ಸ್ನೇಹಿತರೇಕೆ ಶತ್ರುಗಳಾದರು?
ಅಮ್ಮನ ಮಾತೇಕೆ ಓವರ್ ಆಕ್ಟಿಂಗ್ ಅಂತಾಯಿತು?
ಅಪ್ಪನ ಮಾರ್ಗದರ್ಶನ ಗೊಡ್ಡು ಎಂದೆನಿಸಿತು?
ತಂಗಿಯ ಪ್ರೀತಿ ವಟವಟವೆನಿಸಿತು?

ನಿದ್ದೆಯಿಂದ ಎಬ್ಬಿಸಿದ ಸೊಳ್ಳೆಗೆ ಧನ್ಯವಾದ ಹೇಳಲೇಬೇಕೆನಿಸಿತು

ಹುಡುಕುತ್ತಿದ್ದೇನೆ,
ಸಿಕ್ಕರೆ ಖಂಡಿತಾ ಸನ್ಮಾನ-ಸಮಾರಂಭ-ಉಪ್ಪಿಟ್ಟು-ಕಾಫಿ
ಸಾಧ್ಯವಾದರೆ ನೀವೂ ಬನ್ನಿ
ಮಲಗಿದ್ದರೆ ಎಚ್ಚರಗೊಳ್ಳಿ :)

-ಚಿನ್ಮಯ
15/12/2017

ಕೃಪೆ:ವಾಟ್ಸಪ್

ಹಸಿರಂಗಿಯ ಈ ವಾಟ್ಸಪ್ಪು, ಅಂಗೈಗೆ ಅರ್ಜಂಟಿನಾಸರೆ
ಸ್ಕ್ರೋಲಾಗುವ ಸ್ಟೇಟಸ್ಸಿನಲ್ಲೇ 24*7 ಹರಿಯುತಿದೆ ಭಾವಧಾರೆ

ಪರಿಚಯಕ್ಕೊಂದು ಚಂದದ ಸ್ಮೈಲಿ
ಹುಟ್ಟುಹಬ್ಬಕ್ಕೊಂದು ಚಾಕಲೇಟಿನ ಥೈಲಿ
ಖುಷಿಯಾದಾಗಲೆಲ್ಲ ರಂಗುರಂಗಿನ ಚಿತ್ತಾರ
ಹೊಸ ಡೀಪಿಯಲಿ ಪೋಸಿನಾ ವೈಯ್ಯಾರ
ಪ್ರೀತಿ ಹೆಚ್ಚಾದಾಗೆಲ್ಲಾ ಮಂಗವೇಷದ ಪೋಟೋ
ಬೇಸರಾದಗೊಮ್ಮೊಮ್ಮೆ ಫಿಲಾಸಫಿಕಲ್ “ಕೋಟು”

ಮೆಸ್ಸೇಜು ಮಾಡಿದ ಮೇಲೆ ಡಬಲ್ ಟಿಕ್ಕಿಗಾಗಿ ಆತುರ
ನೀಲಿಟಿಕ್ಕಿನ ನಂತರವೂ ರಿಪ್ಲೈ ಬಾರದಿರೆ ಭಾರೀ ಬೇಸರ
ಆಕ್ಚುಲಿ, ನೋಟಿಫಿಕೇಷನ್ ಜೊತೆಗೇ ಮೆಸ್ಸೇಜು 90% ಅರ್ಥವಾಗುತ್ತದೆ
ಅನ್ನೌನು ನಂಬರು ಬಂದರೆ ಮಾತ್ರ ಕುತೂಹಲ ಇಮ್ಮಡಿಯಾಗುತ್ತದೆ
ವಿಡಿಯೋ ಡೌನ್ಲೋಡು ಆಗುವಷ್ಟರಲ್ಲೇ ಕ್ಯಾಸೆಟ್ಟು ಓಡಿರುತ್ತದೆ
ಇಮೇಜು ಓಪನ್ ಆಗುವಷ್ಟರಲ್ಲೇ ಹುಬ್ಬು ಹಣೆಸೇರಿರುತ್ತದೆ

ಇನ್ನು ಆ ಗ್ರೂಪುಗಳು.
ಗ್ರೂಪುಗಳು ಥೇಟು ಬಸ್ಸಿನಂತೆ ಬೇಡದಾಗ ದಂಡಿಯಾಗಿ ಬರುತ್ತಿರುತ್ತವೆ
ಅಪ್ಪಿ-ತಪ್ಪಿ ಏನೋ ಅರ್ಜಂಟಿದ್ದಾಗ ಮಾತ್ರ ಜಗತ್ತೇ ಖಾಲಿಯಾಗಿರುತ್ತದೆ
ಫ್ಯಾಮಿಲಿ-ಫ್ರೆಂಡ್ಸು-ಕಲೀಗ್ಸು-ಬಾಸು ಎಲ್ಲರಿಗೂ ಒಂದೊಂದು ಗ್ರೂಪು
ದಿನಗತಿಗೆ ತಕ್ಕಂತೆ ಮ್ಯೂಟ್ ಮೋಡು ಆನು-ಆಫು
ಈಗಷ್ಟೇ ಸ್ಮಾರ್ಟ್ ಆದ ಸೀನಿಯರ್ ಆಂಟಿ-ಅಂಕಲ್‍ಗಳೇನಕರಿಗೆ
ಫೋಟೋ-ವೀಡಿಯೋಗಳನು ಫಾರ್ವರ್ಡ್ ಮಾಡುವ ತೀಟೆ
ಅದಕೊಂದು ರಿಪ್ಲೈ ಮಾಡದಿದ್ದರೆ ಅಪ್ಪ-ಅಮ್ಮನ ಗಲಾಟೆ
ಎಷ್ಟೋ ಸಲ ಸಾಕೆಂದು ವಾಟ್ಸಾಪು ಅನ್‍ಇನ್‍ಸ್ಟಾಲ್ ಮಾಡಿದ್ದಿದೆ
ಆಮೇಲೆ ಎಲ್ಲರಿಗೂ ವಿಷಯ ತಿಳಿಸಲು ಮತ್ತೆ ಡೌನ್‍ಲೋಡ್ ಮಾಡಿದ್ದಿದೆ

ಅಂತೂ ಬದುಕು ನಡೆಯುತ್ತಿದೆ ಪೇಟಿಎಮ್ಮು-ಸ್ವಿಗ್ಗೀ-ವಾಟ್ಸಪ್ಪಿನ ಕೃಪೆಯಿಂದ
ಫೋನ್-ಸ್ಮಾರ್ಟಾದಷ್ಟೂ ತಲೆತುಕ್ಕು ಹಿಡಿಯುತಿದೆಯೋ ಎಂಬ ಅನುಮಾನ ನಿನ್ನೆಯಿಂದ ಕಾಡುತಿದೆ.
-ಚಿನ್ಮಯ
16/11/2017

ಕಾಫಿಹೂವು

ಮಲ್ಲಿಗೆಯ ಬನವೆಂದು ತೋಟಕ್ಕೆ ಅಡಿಯಿಟ್ಟೆ
ಎಲ್ಲೆಲ್ಲೂ ಹಿಮರಾಶಿ; ಪರಿಚಯ-ಮಾತಿನ ರಾಶಿ
ಮಟ್ಟಿದ ಮಾಲೆಯಂತೆ ಟೊಂಗೆಗುಂಟ ಹೂವುಗಳು
ನಗೆಯಲ್ಲಿ ಕಂಡ ದಾಳಿಂಬೆಹಲ್ಲು;ರೆಪ್ಪೆ ಸವರುತ್ತಿದ್ದ ಮುಂಗುರುಳು

ಹೂವ ಬಳಿ ಹೋಗಿ ಆಘ್ರಾಣಿಸಲು ಬೇರೇನೋ ಕಂಪು
ಇಂಜಿನಿಯಿರಿಂಗಿನ ನಟ್ಟನಡುವೆ ಸವಿಸಾಹಿತ್ಯದ ಜೋಂಪು
ಮೆದುಳ ಮೂಲೆ ಮುಟ್ಟಿ ಮಾರ್ದನಿಸುವ ಕಾಫಿಯ ಪರಿಮಳ
ಹೇಗೆ ಮರೆಯಲಿ ಹುಚ್ಚು ಹಿಡಿಸಿದ ಮಲೆನಾಡಿನ ಮಧುರ ಮಾತುಗಳ

ಹೂವ ಕೊಯ್ದು ದೇವರ ಪೀಠಕ್ಕೇರಿಸುವ ಮನಸ್ಸಂತೂ ಇರಲಿಲ್ಲ
ಮೆತ್ತಗಿದ್ದ ಪಕಳೆಗೆ ಕೆನ್ನೆಯಾನಿಸಿ ಅರೆಗಳಿಗೆ ಮಲಗಬೇಕಿತ್ತಷ್ಟೇ
ಇಲ್ಲಿಯವರೆಗೆ ಯಾವ ಹೂವಿನ ಬಗ್ಗೆಯೂ ಹೀಗೆಲ್ಲ ಅನಿಸಿರಲಿಲ್ಲ
ಇದೇಕೆ? ಬಹುಷಃ ಇದೂ ನನ್ನಂತೆ ನಾರ್ಮಲ್ ಕೇಸಾಗಿರಲಿಲ್ಲ

ಈ ಹೂವು ವರುಷಕ್ಕೊಮ್ಮೆ ಮಾತ್ರ ಬಿಡುವುದಂತೆ
ನಿಜವಾದ ಪ್ರೀತಿ ಅಪರೂಪಕ್ಕೊಮ್ಮೆ ಮಾತ್ರ ಆಗುವುದಂತೆ
ನೋಡುತ್ತ ನಿಲ್ಲುತ್ತಿದ್ದೆ ಅದನ್ನೇ, ಹಸಿರು-ಪ್ರಕೃತಿಯಲಿ ಬೆರೆತು
ಎಲ್ಲ ಮಾತಾಡಿಬಿಡುತ್ತಿದ್ದೆ ಖಾಸಗಿ ಕನಸುಗಳೆಂಬುದನೂ ಮರೆತು

ಅದೇನೋ ಕಾಫಿ ಹೂ ಬಿಟ್ಟಾಗ ಮಳೆ ಭರ್ರೆನ್ನ ಬಾರದು; ಬಂತು
ಪ್ರೀತಿ ಮೊಳಕೆಯೊಡೆದ ಮೇಲೆ ದೂರಾಗಬಾರದು; ಆಗಿದ್ದಾಯಿತು
ಮೋಡಗಟ್ಟಿ ತೋಟಕೆಲ್ಲ ಮಳೆಬಂದರೆ ಎಲ್ಲೆಲ್ಲಿ ಕೊಡೆ ಹಿಡಿದೇನು?
ಚದುರಿಹೋದ ಮನಸುಗಳಿಂದ ಚಪ್ಪಾಳೆ ಸದ್ದು ಹೇಗೆ ಕೇಳಿಯೇನು?

ಇಂದು ತೋಟದಲ್ಲಿ ಹೂವಿಲ್ಲ; ಕಾಯಿಗಳಿವೆ.
ಮನಸ್ಸಿನಲ್ಲಿ ನೋವಿಲ್ಲ; ಗಾಯಗಳಿವೆ

ಜಗತ್ತಿಗೇನು? 
ಹೊಸ ಹೂವು ಹುಡುಕು ಅನ್ನುತ್ತದೆ

ಬಜಾರದ ಗಲ್ಲಿಯಲ್ಲಿ ತರಹೇವಾರಿ ಹೂವೂ ಸಿಗುತ್ತದೆ
ನೆಟ್ಟಗೆ, ನಗುನಗುತ್ತಾ, ಘಂ ಎಂದು ಎಲ್ಲರನ್ನೂ ಸೆಳೆಯುತ್ತದೆ
ನಾನು ಮಾತ್ರ ಈ ಬಜಾರದ ಮಲ್ಲಿಗೆಯಿಂದ ದೂರವಿದ್ದೇನೆ
ಕಾಫಿಗಿಡ ಮತ್ತೆಂದು ಹೊಸ ಹೂ ಬಿಡುವುದು ಎಂದು ಕಾದಿದ್ದೇನೆ.
-ಚಿನ್ಮಯ
17/09/2017

ಖಂಡಿತಾ ಸಿಗಬೇಡ

ಹತ್ತಿರದಲ್ಲೆಲ್ಲೋ ಇರಬೇಕು ನೀನು, ಖಂಡಿತಾ ಸಿಗಬೇಡ

ದೂರದಿಂ ಮರೆಯಾಗಿಬಿಡು ದಯವಿಟ್ಟು ಕಾಣಿಸಬೇಡ

ನೀನು ನೀನೇ, ನಾನು ನಾನೇ

ಆದರೆ ಈಗ ನಾವಿಬ್ಬರೂ ಮೊದಲಿನಂತಿಲ್ಲ

ಸ್ನೇಹ-ಮಮತೆ-ಪ್ರೀತಿ-ಸಲಿಗೆ ಪದಗಳಷ್ಟೇ

ಅಸಲಿಗೆ ಅನುಭವವನ್ನು ಅಕ್ಷರಗಳಲ್ಲಿ ಹೇಳಲೇ ಸಾಧ್ಯವಿಲ್ಲ

ಆಗಸದಷ್ಟು ಕನಸು, ಬೆಟ್ಟದಷ್ಟು ವಿಶ್ವಾಸ

ಹಸಿರುಗಣ್ಣು, ಸಂಜೆಗೂ ಬಾಡದ ಮಂದಹಾಸ

ರೆಂಬೆ ಟಿಸಿಲೊಡೆದು ಹೊಸ ಚಿಗುರು ಹೊರಟಿದ್ದು ನಿಜ

ಆದರೆ, ಕರಿಮೋಡ ಮುಸುಕಿದಾಗೆಲ್ಲ ಮಳೆ ಸುರಿಯಲೇಬೇಕೆಂದಿಲ್ಲ

ನಾವಂದುಕೊಂಡಿದ್ದೆಲ್ಲ ಖಾಯಂ ಆಗಿ ದಕ್ಕಲೇಬೇಕೆಂದಿಲ್ಲ

ಗಾಳಿಗೆ ಹಾರಿದ ಒಣಬೀಜ ಪರವೂರಿನಲ್ಲಿ ಕಳೆಯಾಯ್ತು

ಅಂಗಳದಲಿ ಬಿದ್ದ ಹಸಿಬೀಜ ಹಿತ್ತಲಿನ ಸಸಿಯಾಯ್ತು

ಎರಡೂ ಒಂದೇ ಆಗ, ಆದರೀಗ ಸಂಪೂರ್ಣ ಬೇರೆ ಬೇರೆ

ಬೇರೂರಿದ ಜಾಗ ಬದಲಾದಮೇಲೆ ಕಾಣಿಸುತ್ತದೆ ಗಡಿ-ರೇಖೆ-ಮೇರೆ

ಕಳೆಯೆನಿಸಿಕೊಂಡು, ಎಲ್ಲರಿಂ ಬೈಸಿಕೊಂಡು

ಅವರಿವರಿಂದ ಎಳೆಸಿಕೊಂಡು, ಕುಡುಕರಿಂದ ಕಡಿಸಿಕೊಂಡು

ನೋವು ಎಂಬುದನೇ ತ್ಯಜಿಸಿ ಮೋಕ್ಷಕ್ಕೆ ಅಣಿಯಾಗುತ್ತಿದ್ದೇನೆ

ಈ ಸಮಯದಲ್ಲಿ ಮತ್ತೆ ಹೂಬಿಡುವ ಗಿಡವೆಂದು ನೆನಪಿಸಬೇಡ

ದೇವರ ಪೀಠದಲಿ ಕುಳಿತು ರಾರಾಜಿಸುವ ಆಸೆಹುಟ್ಟಿಸಿ

ದನದ ಬಾಯಿಗೋ, ಕಿಡಿ ಬೆಂಕಿಗೋ ಆಹುತಿಯಾಗಿಸಬೇಡ

ಆ ಕಡೆಯಿಂದ ಬಂದ ಗಾಳಿಯಲಿ ಬೆರೆತಂತಿದೆ ಹಳೆಯ ಪರಿಮಳ

ಅದೇ ಘಮ, ಅದೇ ಸೆಳೆತ, ಅದೇ ನಗು, ಅದೇ ಆಕರ್ಷಣೆ

ದೂರ ಹೋಗಿ ಬಿಡು ಆದಷ್ಟು ಬೇಗ ಇಲ್ಲಿಂದ ಚಿನ್ನಾ

ಬಿಟ್ಟ ಬೇರೆತ್ತಿ ಜಿಗಿದು ನಾ,ಮತ್ತೊಂದೆಡೆ ಹಾರುವ ಮುನ್ನ

-ಚಿನ್ಮಯ

16-08-2017

ಕಂಟ್ರೋಲ್+ಎಸ್

ಸರ್ವರ್ ಡೌನ್ ಆಗಿರೋದ್ರಿಂದ ಆಫೀಸಿನ ಕೆಲಸ ಅರ್ಧಕ್ಕೇ ಹಾಲ್ಟ್ ಆಗಿದೆ. ಸರ್ವರ್ ಅಪ್ ಆಗೋದಕ್ಕೆ 11:45 ಆಗಬಹುದು ಅನ್ನೋ ಮೇಲ್ ಬಂದಿದೆ.  ಈ ಹನ್ನೊಂದರ ಅಪರಾತ್ರಿಯಲ್ಲಿ ಮತ್ತೇನೂ ಕೆಲಸ ಕಾಣದೇ ಗೀಚ್ತಾ ಇದೀನಿ. 

ಇದು ಪ್ರತೀದಿನ ನಡೆದಿದ್ದನ್ನ ಬರಿಯೋ ಡೈರಿ ಅಲ್ಲ. ಏನೇನೋ ಇಮ್ಯಾಜಿನ್ ಮಾಡ್ಕೊಂಡು ಕತೆ-ಕಾದಂಬರಿ ಥರ ಚಂದ ಮಾಡಿ ಬರಿಯೋ ಅಷ್ಟು ಟ್ಯಾಲೆಂಟ್ ನಂಗಿಲ್ಲ. ಬರೀತೀನಿ ಬೇಜಾರಿಗೆ; ಟೈಂ ಪಾಸಿಗೆ. ಊರು ಕಲಿಸಿದ ಕನ್ನಡ ಇನ್ನೂ ಬದುಕಿದೆ ಅನ್ನೋದನ್ನ ನೆನಪ್ ಮಾಡ್ಕೊಳ್ಳೋದಕ್ಕೆ.

ಕನ್ನಡದಲ್ಲಿ ಟೈಪ್ ಮಾಡೋದು ಸ್ವಲ್ಪ ಕಷ್ಟ. ಕಲೀತಾ ಇದೀನಿ. ಬರೀತಾ ಇದ್ರೆ ಈಸಿ ಆಗ್‍ಬಹುದೇನೋ..

ನಾಳೆ ಬೆಳಿಗ್ಗೆ 6.00 ಗೆ ಡೆಡ್ ಲೈನ್ ಇದೆ. ಕೆಲ್ಸಾ ಎಲ್ಲಾ ಆಲ್‍ಮೋಸ್ಟ್ ಆಗಿದ್ರೂ ಕ್ರಾಸ್ ಚೆಕ್ ಮಾಡಿ ಅಂತಾ ಮ್ಯಾನೇಜರ್ ಮೇಲ್ ಹಾಕಿ, ಮನೆಗ್ ಹೋಗಿ ಮಲಗಿದಾರೆ. ಹಂಗಾಗಿ ಮತ್ತೊಂದ್ ಸಲ ಫುಲ್ ಬಿಲ್ಡ್ ಮಾಡಿ ರನ್ ಥ್ರೂ ಮಾಡ್‍ಬೇಕು. ಎಲ್ಲಾದ್ರೂ ಬಗ್ ಬಂದ್ರೆ ಅದನ್ನಾ ಮಾರ್ಕ್ ಮಾಡಿ ಟಿಕೆಟ್ ರೈಸ್ ಮಾಡ್ಬೇಕು. ಏನೇ ಆದ್ರೂ ಬೆಳಗೆ ಒಳಗೆ ಮುಗಿಬೇಕು.  ಸೋ

[Saved at  mm-dd-yyyy 11:46pm]

+++

ಈ ಥರ ನೋಟ್ ಮಾಡ್ತಾ ಇರೋದು ಒಂಥರ ಮಜಾ ಕೊಡ್ತಾ ಇದೆ. ಇನ್ನೊಂದೆರಡು ಏನೋ ಬರ್ದಿದ್ದೆ. ಮೊನ್ನೆ ಬೈ ಮಿಸ್ಟೇಕ್ ಡಿಲಿಟ್ ಆಗೋಯ್ತು. ಇದೊಂದ್ ಫೈಲ್ ಇದೆ. ಇದ್ರಲ್ಲೇ ಕಂಟಿನ್ಯೂ ಮಾಡ್ತಿನಿ. ಇದನ್ನಾ ಗೂಗಲ್ ಡ್ರೈವ್‍ಗೆ ಸಿಂಕ್ ಮಾಡಿದೀನಿ. ಸೋ ಒಂದಲ್ಲ ಒಂದಿನಾ ನಾನೇ ಇದನ್ನಾ ಓದಿ ನಗ್ತಿನೋ ಏನೋ. ಇದನ್ನ ಸ್ಟಾರ್ಟ್ ಮಾಡಿದ್ ದಿನದಿಂದ ಸರ್ವರ್ ಇಷ್ಯು ಬರ್ತಾನೇ ಇದೆ. ವಾರಕ್ ಒಂದೆರಡ್ ದಿನ ಟೈಪ್ ಮಾಡೋದ್ ನಡೀತಾನೇ ಇದೆ. ಮೊನ್ನೆ ಯಾವ್ದೋ ಬ್ಲಾಗ್ ಓದ್ದೆ. ಚೆನಾಗಿತ್ತು. ನಾನೂ ಬರಿಬೇಕು ಅಂತಾ ಅಂದ್ಕೊಂಡೆ. ಏನೋ ಕವಿತೆ ಬರ್ಯಕ್ ಟ್ರೈ ಮಾಡ್ದೆ. ಚೆನಾಗ್ ಆಗ್ಲಿಲ್ಲಲ್ಲ್ಲ್

[Saved at  mm-dd-yyyy 11:40pm]

+++

ಇವತ್ತು ಇಂಟರ್ನಲ್ ಕಾಂಟಾಕ್ಟ್ಸ್ ಲೀಸ್ಟ್‍ನಲ್ಲಿ ಸಡನ್ನಾಗಿ ನಮ್ಮೂರಿನ ಹುಡುಗಿಯೊಬ್ಬಳ ಹೆಸರು ನೋಡದೆ. ಕಾಂಟ್ರಾಕ್ಟ್ ಎಂಪ್ಲಾಯಿ ಆಗಿರೋದ್ರಿಂದ ಟೀಮ್ ನೇಮ್ ಬಿಟ್ಟು ಬೇರೆ ಏನೂ ಡಿಟೇಲ್ಸ್ ಸಿಗ್ಲಿಲ್ಲ. ಪ್ರೊಫೈಲ್ ಫೋಟೋ ನೋಡಡೆ. ಸೂಪರ್ ಆಗ್ ಇದಾಳೆ. ಮತ್ತೆ ಅ

[Saved at  mm-dd-yyyy 11:20pm]

+++

ನವ್ಯಾ ಜೊತೆ ನಿನ್ನೆ ಟೈಂ ಸ್ಪೆಂಡ್ ಮಾಡಿದ್ದು ಸಖತ್ ಖುಷಿ ಕೊಡ್ತು. ಅದ್ಯಾಕೋ ಈ ನೈಟ್ ಹೊತ್ತಲ್ಲಿ ಅವಳನ್ನಾ ಮಿಸ್ ಮಾಡ್ಕೊತಾ ಇದೀನಿ. ನಮ್ಮೂರಿನ್ ಹೆಸರು ಅವಳ್ ಹೆಸರಿನ್ ಮುಂದಿದೆ ಅಷ್ಟೇ. ಅಪ್ಪ ನಮ್ಮೂರಿನವ್ರು. ಇವಳು ಹುಟ್ಟಿ ಬೆಳದಿದ್ದೆಲ್ಲಾ ಬೆಂಗ್ಳೂರಲ್ಲೇ. ಇನ್‍ಫಾಕ್ಟ್ ನನ್ ಪೀ.ಜಿಯಿಂದ ಆಫೀಸ್ ಬರೋದಕ್ಕೆ ಶಾರ್ಟ್‍ಕಟ್ ಹೇಳ್ಕೊಟ್ಟಿದ್ದೂ ಅವಳೇ. ಅವಳು ಅದ್ ಹ್ಯಾಗೆ ಎಲ್ಲರ್ ಜೊತೆ ಮಿಂಗಲ್ ಆಗ್ತಾಳೋ ನಂಗಂತೂ ಗೊತ್ತಿಲ್ಲ. ಸೀನಿಯರ್ಸು, ಜ್ಯೂನಿಯರ್ಸು, ಇಂಟನ್ರ್ಸು ಎಲ್ಲಾರ್ನೂ ಸೇರ್ಸಿ, ನಾ ಬರಲ್ಲಾ ಅಂದ್ರೂ ಕೇಳ್ದೇ ನನ್ನ್ ಎಳ್ಕೊಂಡು ನಿನ್ನೆ ಲಂಚ್ ಆದ್ಮೇಲೆ ಅಂತ್ಯಾಕ್ಷರಿ ಆಡಿದ್ವಲ್ಲಾ, ಸೂಪರ್ರಾಗ್ ಇತ್ತು. ಈಗ್ಯಾಕೋ ಮೊನ್ನೆ ಅವಳು ಹೇಳಿದ್ ಫನಾ ಫಿಲಂ ಹಾಡು ಕೇಳ್ತಾ ಇದ್ದ ಹಾಗೆ ಹುಚ್ಚ್ ಹಿಡಿತಾ ಇದೆ.

ತೇರೇ ಹಾಥ್ ಮೇ ... ಮೇರಾ ಹಾಥ್ ಹೋ..ಸಾರಿ ಜನ್ನತೇ..ಲಾಲಾ ಲಾಲಲಾ..

ಹಾಡ್‍ನಾ ಲೂಪ್ ಮೋಡಲ್ಲಿ ಕೇಳ್ತಾ ನಂಗೂ ಏನಾದ್ರೂ ಬರ್ಯಣಾ ಅನ್ನಿಸ್ತಾ ಇದೆ. ಎಷ್ಟ್ ದಿನ ಆಯ್ತು ಬರೀದೆ?

[Saved at  mm-dd-yyyy 12.01am]

+++

ಹೋದ ವಾರ ಬರೆದ ಹಾಡನ್ನಾ ಅವಳಿಗೆ ಟೆಕ್ಸ್ಟ್ ಮಾಡಿದ್ದೆ. ತುಂಬಾ ಇಷ್ಟ ಪಟ್ಲು. ನನ್ ಬಗ್ಗೆನೂ ಏನಾದ್ರೂ ಬರ್ಕೊಡೋ ಅಂದ್ಲು. ಏನ್ ಬರ್ಯೋದು ಗೊತ್ತಾಗ್ಲಿಲ್ಲ. ಹಂಗೆಲ್ಲಾ ಒಬ್ಬರ ಬಗ್ಗೆ ಬರ್ಯೋದ್ ಸರಿ ಅಲ್ಲ. ಸಮಾಜದ ಬಗ್ಗೆ ಬರಿಬೇಕು. ಬದಲಾವಣೆ ಬಗ್ಗೆ ಬರಿಬೇಕು. ನಮ್ಮ್ ಒಳಗಡೆ ಇರೋ ಹೊಯ್ದಾಟಗಳ ಬಗ್ಗೆ ಬರಿಬೇಕು. ಆಗ ಬರವಣಿಗೆಗೆ ಒಂದ್ ಮೀನಿಂಗ್...

[Saved at  mm-dd-yyyy 11:40pm]

+++

ನವ್ಯಾ ಜೊತೆ ಮಾತಾಡ್ತಾ ಹೇಳ್ತಿದ್ಲು ಲೈಫಲ್ಲಿ ಏನಾದ್ರೂ ಅಚೀವ್ ಮಾಡ್ಬೇಕು ಅಂತಿಯಲ್ಲಾ ಯಾಕೆ ಅಂತಾ? ಲೈಫ್ ಹೆಂಗ್ ಬರತ್ತೋ ಹಂಗ್ ಇರಕ್ಕ್ ಆಗಲ್ವಾ? ನಾನ್ ಆಗಲ್ಲ ಅಂತಾ. ಅವಳು ಆಗತ್ತೆ ಅಂತಾ. ಅವಳಿಗ್ ಏನ್ ಅನ್ಸತ್ತೆ ಗೊತ್ತಿಲ್ಲ, ಮನೆಯ ಹಿರಿಮಗ ಆಗಿ ನಾನಂತೂ ನನ್ ಫ್ಯೂಚರ್‍ನಾ ಸೆಟ್ ಮಾಡ್ಕೊಳ್ಳೇಬೇಕು. ಲೈಫಲ್ಲಿ ಆದಷ್ಟ್ ಬೇಗ ಸೆಟಲ್ ಆಗ್ಬೇಕು. ಈಗ ಎಂ.ಟಿ.ಎಸ್-1, ಆಮೇಲೆ ಎಂ.ಟಿ.ಎಸ್-2,3, ಸೀನಿಯರ್ ಎಂ.ಟಿ.ಎಸ್, ಟೀಂ ಲೀಡ್ ಆಮೇಲೆ ನಂದೇ ಒಂದು ಸ್ಟಾರ್ಟ್ ಅಪ್. ಅದು ಕರೆಕ್ಟಾಗಿ ವರ್ಕೌಟ್ ಆದ್ರೆ ಲೈಫು ಸೆಟಲ್. ಇದನ್ನೆಲ್ಲಾ ಅವಳಿಗ್ ಹೇಳಿದ್ರೆ ಅರ್ಥನೇ ಮಾಡ್ಕೊಳಲ್ಲಾ. ಲೈಫಲ್ಲಿ ಏನೋ ಟ್ವಿಸ್ಟ್ ಬೇಕಂತೆ. ಥ್ರಿಲ್ ಬೇಕಂತೆ. ನಿಜ್ವಾಗ್ಲೂ ಹಂಗ್ ಹೇಳ್ತಿದ್ಲಾ. ಇಲ್ಲಾ?

[Saved at  mm-dd-yyyy 11:54pm]

+++

ನವ್ಯಾ ಓರಾಕಲ್ ಜಾಯಿನ್ ಆದ್ರೂ ನಾವ್ ಕೆಫೆಟೇರಿಯಾದಲ್ಲಿ ಮೀಟ್ ಆಗೋದ್ ನಿಂತಿಲ್ಲ. ಅದೇನೋ ಲಂಚ್ ಆದ್ಮೇಲೆ ಅಂತ್ಯಾಕ್ಷರಿ ಆಡೋದು ಹ್ಯಾಬಿಟ್ ಆಗ್‍ಬಿಟ್ಟಿದೆ. ಓರಾಕಲ್,ಅಕ್ಸೆಂಚರ್,ವಿಮ್‍ವೇರ್, ಸಿಂಫನಿ ಎಲ್ಲಾರೂ ಟಾಪ್ ಫ್ಲೋರ್‍ಗೇ ಊಟಕ್ ಬರೋದು. ನಾರ್ತ್ ಅವರೇ ಜಾಸ್ತಿ. ಒಂದ್ ಹತ್ತ್ ಜನರ ಟೀಂ ನಮ್ದು.ಅಲ್ಲಲ್ಲ ನವ್ಯಾದು. ನಾನ್ ಸುಮ್ನೆ ಇರೋದೇ ಜಾಸ್ತಿ..

ಯಾಕ್ ಗೂಬೆ ಥರ ಇರ್ತಿಯಾ ಅಂತಾ ಬೈತಾ ಇರ್ತಾಳೆ. ಅದೇನೋ ಹಿಂದಿ ನನಿಗ್ ಸರ್ಯಾಗ್ ಬರಲ್ಲ. ಕಾ ಎಲ್ಲಿ ಕೀ ಎಲ್ಲಿ ಅನ್ನೋದೇ ಕನ್‍ಫ್ಯೂಷನ್ನು. ಅವಳಿಗೂ ಸರಿ ಬರಲ್ಲ. ಆದ್ರೆ ಮಾತಾಡೋದ್ ನಿಲ್ಸಲ್ಲ.

[Saved at  mm-dd-yyyy 11:20pm]

+++

ಮಾಡಕ್ ಬೇರೆ ತುಂಬಾ ಕೆಲ್ಸಾ ಇದ್ರುನೂ ಯಾಕ್ ಇವತ್ತು ನವ್ಯಾ ಬಗ್ಗೆನೇ ತಲೆಕೆಡುಸ್ಕೊಳ್ತಾ ಇದೀನಿ? ಅವಳು ನಂಗ್ಯಾರೂ ಸ್ಪೆಷಲ್ ಅಲ್ಲ. ಜಸ್ಟ್ ಅನದರ್ ಫ್ರೆಂಡ್ ಅಷ್ಟೇ.

ನಂಬರ್ ಡಿಲೀಟ್ ಮಾಡ್ದೆ.

ವಾಟ್ಸಪ್‍ನಲ್ಲಿ ಬ್ಲಾಕ್ ಮಾಡ್ದೆ.

ಎಫ್.ಬಿ ಅಲ್ಲಿ ಅನ್‍ಫಾಲೋ ಮಾಡ್ದೆ.

ಪ್ರಾಡಕ್ಟ್ ಡಿಲೆವರಿ ಟೈಂ ಹತ್ರ ಬರ್ತಾ ಇದೆ. ಇನ್ನು ಟೈಂ ವೇಸ್ಟ್ ಮಾಡ್‍ಬಾರ್ದು. ಸರ್ವರ್ ಡೌನ್ ಆಗಿದ್ರೆ, ಲೋಕಲ್ ಸಿಸ್ಟಮ್ ಅಲ್ಲಿ ಏನ್ ಮಾಡಕ್ಕಾಗತ್ತೆ ಟ್ರೈ ಮಾಡ್ಬೇಕು.

ನವ್ಯಾ ಈಸ್ ನೋ ವನ್ ಟು ಮಿ...

[Saved at  mm-dd-yyyy 12:40am]

+++

ಬ್ಯಾಕ್ ವಿಥ್ ಅ ಬ್ಯಾಂಗ್. ಫಸ್ರ್ಟ್ ಪ್ರಮೋಷನ್. ತುಂಬಾ ಖುಷಿಪಟ್ರು ಮನೆನಲ್ಲಿ ಎಲ್ರೂನೂ. ಐ ಆಮ್ ಹ್ಯಾಪಿ ಅಂತಾ ಎಲ್ಲರಿಗೂ ಅನ್ನಿಸ್ತಾ ಇದೆ. ಬಟ್ ನಂಗೀಗ ಸಡನ್ನಾಗಿ ಯಾಕೋ ನವ್ಯಾ ನೆನಪಾಗ್ತಾ ಇದಾಳೆ. ಅವಳಿಲ್ಲಾ ಅಂದಿದ್ರೆ ನಾನ್ ಇಲ್ಲ್ ಇರಕ್ ಸಾಧ್ಯನೇ ಇರ್ತಿರ್ಲಿಲ್ಲ. ನಿನ್ ಹತ್ರ ಆಗತ್ತೆ ಅಂತಾ ಪುಷ್ ಮಾಡಿದ್ದೇ ಅವಳು. ಅದೇನೇನೋ ಆಗಿ ಅವಳನ್ನ ಅವಾಯ್ಡ್ ಮಾಡ್ದೆ.

ಈಗ ತುಂಬಾ ಮಿಸ್ ಮಾಡ್ಕೊತಾ ಇದೀನಿ

[Saved at  mm-dd-yyyy 11:59 pm]

+++

ಎರಡ್ ವರ್ಷದ್ ಬಾಂಡ್ ಇನ್ನೇನು ಮುಗೀತಾ ಬಂತು. ಅಡೋಬಿ ಇಂದಾ ಒಳ್ಳೆ ಆಫರ್ ಬಂದಿದೆ. ನನ್ ಕಂಪನಿಯಲ್ಲಿ ಎಚ್.ಆರ್ ಆಗಿದ್ದೋರು ಈಗ ಅಲ್ಲಿದಾರೆ. ಹಾಗಾಗಿ ಲಿಂಕ್ ಸಿಗ್ತು. ಅಲ್ಲಿ ಗ್ರೋತ್ ಚೆನಾಗಿದೆ ಅಂತಾ ಕಲೀಗ್ಸ್ ಎಲ್ಲಾರೂ ಹೇಳಿದ್ರು. ಈಗಷ್ಟೇ ಇನ್‍ಫಾರ್ಮಲ್ ಆಗಿ ಮ್ಯಾನೇಜರ್ ಹತ್ರ ಮಾತಾಡ್ ಬಂದೆ. 45 ಡೇಸ್ ನೋಟೀಸ್ ಪೀರಿಯಡ್ ಇರತ್ತೆ. ಹೊಸಾ ಪ್ರಾಜೆಕ್ಟ್ ಈಗಷ್ಟೇ ಸ್ಟಾರ್ಟ್ ಆಗಿರೋದ್ರಿಂದ ನನ್ ಕಡೆಯಿಂದ್ ಏನೂ ಆಬ್ಜೆಕ್ಷನ್ ಇಲ್ಲ. ಫಾರ್ಮಲ್ ಆಗಿ  ಮೇಲ್ ಕಳ್ಸಿ ಎಚ್.ಆರ್ ಹತ್ರ ಮಾತಾಡ್ತೀನಿ ಅಂದ್ರು.

[Saved at  mm-dd-yyyy 11:47pm]

+++

ಇವತ್ ಲಾಸ್ಟ್ ಡೇ. ಅಲ್ಲಲ್ಲ ಲಾಸ್ಟ್ ನೈಟ್. ಎಲ್ಲರಿಗೂ ಬೈ ಹೇಳಿ ಹೊರಡ್ತಾ ಇದೀನಿ. ತುಂಬಾ ಮಿಸ್ ಮಾಡ್ಕೊತೀನಿ ಈ ಕಂಪನಿನಾ, ಈ ಡೆಸ್ಕ್‍ನಾ..

[Saved at  mm-dd-yyyy 09:47pm]

+++

ಒಂದೂವರೆ ತಿಂಗಳಾದ್ಮೇಲೆ ಫಸ್ರ್ಟ್ ಟೈಂ ಟೈಯರ್ಡ್ ಅನಿಸ್ತಾ ಇದೆ. ಫುಲ್ ಕೆಲಸಾ. ಯಾಕಾದ್ರೂ ಕಂಪನಿ ಚೇಂಜ್ ಮಾಡ್ದೆ ಅನಿಸ್ತಾ ಇದೆ. ಅವಾಗಾ 40% ಹೈಕ್ ಅಂದೋರು ಈಗ ಅದು ಇದು ಕತೆ ಹೇಳಿ 25% ಕೊಟ್ಟಿದಾರೆ. ಏನೋ ಲೈಫಲ್ಲಿ ಅಂದ್ಕೊಂಡಿದ್ ಒಂದೂ ಆಗ್ತಿಲ್ಲಾ. ಏನೋ ಮಿಸ್ಸಿಂಗು. ಏನ್ ಮಾಡ್ಲಿ ಗೊತ್ತಾಗ್ತ್

[Saved at  mm-dd-yyyy 03:23am]

+++

ಡನ್ ವಿತ್ ಎಂ.ಬಿ.ಏ. ಬಿಟ್ಸ್‍ಪಿಲಾನಿಯಿಂದ ಎಂ.ಬಿ.ಎ ಮುಗ್ಸಿದ್ದು ಖುಷಿ ಆಗ್ತಿದೆ. ಇನ್ನು ಮ್ಯಾನೇಜರಿಯರ್ ಏರಿಯಾ ಕಡೆಗೂ ಚಾನ್ಸ್ ಇರತ್ತೆ ಅಂತಾ ಕಲೀಗ್ ಹೇಳ್ತಿದ್ರು

[Saved at  mm-dd-yyyy 1:51am]

+++

ಅಡೋಬಿಗೆ ಬಂದು ಒಳ್ಳೆ ಕೆಲಸಾ ಮಾಡ್ದೆ ಅಂತಾ ಮೊದಲನೇ ಸಲ ಅನಿಸ್ತಾ ಇದೆ. ಅಲ್ಲೇ ಇದ್ದಿದ್ರೆ ಇಷ್ಟ್ ಬೇಗ ಇನ್ನೊಂದ್ ಪ್ರಮೋಷನ್ ಸಿಗ್ತಾ ಇರ್ಲಿಲ್ಲ. ನಮ್ಮ್ ಟೀಂ ಲೀಡ್ ಬಿಟ್ರೆ ನಾನೇ ಸೀನಿಯರ್ರು ನಮ್ ಟೀಂನಲ್ಲಿ. ಮ್ಯಾನೇಜರ್ ಕೂಡಾ ಜಾಸ್ತಿ ಏನೂ ಹೇಳಲ್ಲ. ಒಂಥರಾ ಇಲ್ಲೀಗ ನಮ್ದೇ ಸಾಮ್ರಾಜ್ಯ. ಆದ್ರೆ ಒಂದೊಂದ್ ಸಲ ಹೆದ್ರಿಕೆ ಆಗತ್ತೆ. ಯಾಕಂದ್ರೆ ನೌ ಐ ಆಮ್ ಇನ್ ಅ ರಿಲೇಷನ್‍ಶಿಪ್. ಈ ಸಾಫ್ಟ್‍ವೇರ್ ಫೀಲ್ಡ್‍ನಲ್ಲಿ ಯಾವಾಗ ಏನ್ ಆಗತ್ತೆ ಗೊತ್ತಿಲ್ಲ. ಮನೆಲ್ ಯಾರ್ ಏನ್ ಹೇಳ್ತಾರೆ ಅನ್ನೋದೂ ಗೊತ್ತಿಲ್ಲ. ಎಲ್ಲಾ ದೇವರಿಗ್

[Saved at  mm-dd-yyyy 02:32am]

+++

ಮನೆಲ್ ಕೊನೆಗೂ ಒಪ್ಕೊಂಡ್ರು. ಮದ್ವೆಗಿಂತ ಮುಂಚೆ ಕಂಪನಿ ಚೇಂಜ್ ಮಾಡಿದ್ದೂ ಆಯ್ತು. ಹೊಸಾ ಸ್ಟಾರ್ಟ್ ಅಪ್‍ಗೆ ಹೋಗ್ತಾ ಇದೀನಿ. ಥ್ಯಾಂಕ್ಯೂ ಅಡೋಬಿ ನನ್ನ್ ಸಾಕಿದ್ದಕ್ಕೆ ಮೂರ್ ವರ್ಷಾ.

[Saved at  mm-dd-yyyy  4:00pm]

+++

ಉಫ್. ಹೊಸಾ ಕೆಲಸಾ. ಹೊಸಾ ಆಫೀಸು. ಸ್ಟ್ರಕ್ ಆಗಿದೀನಿ. ಎಲ್ಲಾರ್ ನಂಬರ್ ಕಲೆಕ್ಟ್ ಮಾಡಿ, ಕಾಂಟಾಕ್ಟ್ ಮಾಡ್ತಾ ಇದೀನಿ. ಎಷ್ಟ್ ಜನ ಬರ್ತಾರೆ ಗೊತ್ತಿಲ್ಲ.

[Saved at  mm-dd-yyyy  2:00pm]

+++

ನವ್ಯಾನಾ ಮೀಟ್ ಮಾಡಕ್ ಹೋಗ್ತಾ ಇದೀನಿ ಈ ವೀಕೆಂಡ್ ಚಿಕ್ಕಮಗಳೂರಿಗೆ.

[Saved at  mm-dd-yyyy  8:00pm]

 *************************************

ಇಷ್ಟೆಲ್ಲ ನೆನಪುಗಳನ್ನ ಸೇವ್ ಮಾಡಿದ ಈ ಜಗತ್ತು ಇವನ ಜೀವವೊಂದನ್ನ್ ಯಾಕ್ ಸೇವ್ ಮಾಡ್ಲಿಲ್ಲ? ಚಿಕ್ಕಮಗಳೂರಿಗೆ ಹೋದೋನು ಯಾಕ್ ವಾಪಸ್ ಬರ್ಲಿಲ್ಲ? ಹೊರಡಕ್ ಮುಂಚೆ ಎ.ಟಿ.ಎಮ್‍ನಿಂದ ಹಿಡಿದು ಗೂಗಲ್ ಅಕೌಂಟ್‍ತನಕ ಎಲ್ಲಾ ಪಾಸ್‍ವರ್ಡ್‍ಗಳನ್ನ ನಂಗ್ಯಾಂಕ್ ಹೇಳ್ ಹೋದ? ನವ್ಯಾನಾ ಮೀಟ್ ಆಗಿದ್ನಾ? ಅವರಿಬ್ಬರ ಮಧ್ಯ ಏನಾದ್ರೂ....

ಅವನನ್ನು ಮದುವೆಯಾಗಬೇಕಿದ್ದ ಹುಡುಗಿ ಗೊಂದಲದಲ್ಲಿದ್ದಳು.ಅಷ್ಟರಲ್ಲಿ ಅವರಿಬ್ಬರೂ ಸೇರಿ ಕೊಂಡುಕೊಳ್ಳಬೇಕು ಎಂದುಕೊಂಡಿದ್ದ ಫ್ಲ್ಯಾಟಿನ ಬ್ರೋಕರ್‍ನಿಂದ ಕಾಲ್ ಬಂದಿತ್ತು..ಕಾಲ್ ಕಟ್ ಮಾಡಿ, ನೋಟ್ ಪ್ಯಾಡಿನಲ್ಲಿ “ಫ್ಲ್ಯಾಟ್” ಎಂದು ಒದ್ದೆಗಣ್ಣಿನಲ್ಲೇ ಟೈಪಿಸಿ ಕಂಟ್ರೋಲ್+ಎಸ್ ಒತ್ತಿದಳು.

-ಚಿನ್ಮಯ

(14/5/17)