ರೊಕ್ಕ ನೋಡದೇ ಕೈಗೆತ್ತಿಕೊಂಡು ; ಊಟ-ನಿದ್ದೆ ಬಿಟ್ಟು; ಓದಿ ಮುಗಿಸಲೇಬೇಕು ಅನಿಸುತ್ತದೆ
ಆದರೇಕೋ ಕೈ ತಾನಾರೆ ಜಗ್ಗುತ್ತದೆ; ಕಾಲು ತಡೆಯುತ್ತದೆ
ಓದಿದರೂ ಓದದಿದ್ದರೂ ಪುಸ್ತಕ ಮಾತ್ರ ಧೂಳು ತಿನ್ನುತ್ತದೆ
ಕೇಳಿದರಾಯ್ತು ಆಡಿಯೋ ರೂಪದಲ್ಲಿ; ಓದಿದರಾಯ್ತು ಟ್ಯಾಬ್ಲೆಟ್ಟಿನಲ್ಲಿ
ತಂದಿಟ್ಟ ಪುಸ್ತಕಗಳೇ ಸಾಕಷ್ಟು ಬಾಕಿ ಇವೆ; ಕೆಲವಂತೂ ಮರೆತೇ ಹೋಗಿವೆ
ಇರುವುದೆಲ್ಲವ ಬಿಟ್ಟು ಮತ್ತಷ್ಟು ಪುಸ್ತಕ ಖರೀದಿಸಬೇಕೇ ?
ಓದಿ-ಓದಿ ಮರುಳಾಗಿ ಅರ್ಥ-ಒಳಾರ್ಥದಲಿ ಮಥಿಸಬೇಕೇ?
ಹಳೆಯ ಪುಸ್ತಕಗಳನೆಲ್ಲ ಬಿಸುಟು; ಪೂರ್ತಿ ಹೊಸದರಿಂದ ಮಾಡಲೇ ಭರ್ತಿ?
ಕೊಡುವುದಾದರೂ ಹೇಗೆ? ಇವುಗಳ ಮೇಲೆಲ್ಲ ಮೊದಮೊದಲ ಸಂಬಳಗಳ ರಸೀತಿ
ತೆರೆದು ಓದಲಾರದೇ,ಓದದೇ ಇರಲಾರದೇ; ಇದೊಂದು ವಿಚಿತ್ರ ಪಜೀತಿ
ಚಿಕ್ಕಂದಿನಿಂದಲೇ ಬಯಸಿ ಮೈಗೂಡಿಸಿಕೊಂಡ ಓದಿನ ಕಕ್ಕುಲಾತಿ
ಪರಿಹಾರವೇನೆಂದು ಕೇಳಿದರೆ ಇಗೋ ತಿಳಿಯುತ್ತಿಲ್ಲ ಮೂಲಸಮಸ್ಯೆ
ಪ್ರಾಯಶಃ ಇದು ಹುಚ್ಚು ಮನಸ್ಸಿನ ಹನ್ನೊಂದನೇ ಸಮಸ್ಯೆ
ಓದುತ್ತೇನೆ ಆಗೊಮ್ಮೆ ಈಗೊಮ್ಮೆ; ಓದಲೇಬೇಕು ಅನಿಸಿದಾಗ
ಆಫೀಸು-ಇನ್ವೆಸ್ಟಮೆಂಟು-ಕ್ರಿಕೇಟುಗಳ ಮಧ್ಯೆ ನನ್ನ ನಾ ಹುಡುಕಿಕೊಳ್ಳಬೇಕು ಅನಿಸಿದಾಗ
ಅಂಗಡಿಯಲ್ಲಿ ಸಾಗುವಾಗ ಪುಸ್ತಕಗಳು ಮಿರಿ ಮಿರಿ ಮಿನುಗುತ್ತವೆ
ರೊಕ್ಕ ನೋಡದೇ ಕೈಗೆತ್ತಿಕೊಂಡು ; ಊಟ-ನಿದ್ದೆ ಬಿಟ್ಟು; ಓದಿ ಮುಗಿಸಲೇಬೇಕು ಅನಿಸುತ್ತದೆ
ಆದರೇಕೋ ಕೈ ತಾನಾರೆ ಜಗ್ಗುತ್ತದೆ; ಕಾಲು ತಡೆಯುತ್ತದೆ
ಓದಿದರೂ ಓದದಿದ್ದರೂ ಪುಸ್ತಕ ಮಾತ್ರ ಧೂಳು ತಿನ್ನುತ್ತದೆ
-ಚಿನ್ಮಯ
೧೯/೭/೨೦೨೫
No comments:
Post a Comment