ಕೃಪೆ:ವಾಟ್ಸಪ್

ಹಸಿರಂಗಿಯ ಈ ವಾಟ್ಸಪ್ಪು, ಅಂಗೈಗೆ ಅರ್ಜಂಟಿನಾಸರೆ
ಸ್ಕ್ರೋಲಾಗುವ ಸ್ಟೇಟಸ್ಸಿನಲ್ಲೇ 24*7 ಹರಿಯುತಿದೆ ಭಾವಧಾರೆ

ಪರಿಚಯಕ್ಕೊಂದು ಚಂದದ ಸ್ಮೈಲಿ
ಹುಟ್ಟುಹಬ್ಬಕ್ಕೊಂದು ಚಾಕಲೇಟಿನ ಥೈಲಿ
ಖುಷಿಯಾದಾಗಲೆಲ್ಲ ರಂಗುರಂಗಿನ ಚಿತ್ತಾರ
ಹೊಸ ಡೀಪಿಯಲಿ ಪೋಸಿನಾ ವೈಯ್ಯಾರ
ಪ್ರೀತಿ ಹೆಚ್ಚಾದಾಗೆಲ್ಲಾ ಮಂಗವೇಷದ ಪೋಟೋ
ಬೇಸರಾದಗೊಮ್ಮೊಮ್ಮೆ ಫಿಲಾಸಫಿಕಲ್ “ಕೋಟು”

ಮೆಸ್ಸೇಜು ಮಾಡಿದ ಮೇಲೆ ಡಬಲ್ ಟಿಕ್ಕಿಗಾಗಿ ಆತುರ
ನೀಲಿಟಿಕ್ಕಿನ ನಂತರವೂ ರಿಪ್ಲೈ ಬಾರದಿರೆ ಭಾರೀ ಬೇಸರ
ಆಕ್ಚುಲಿ, ನೋಟಿಫಿಕೇಷನ್ ಜೊತೆಗೇ ಮೆಸ್ಸೇಜು 90% ಅರ್ಥವಾಗುತ್ತದೆ
ಅನ್ನೌನು ನಂಬರು ಬಂದರೆ ಮಾತ್ರ ಕುತೂಹಲ ಇಮ್ಮಡಿಯಾಗುತ್ತದೆ
ವಿಡಿಯೋ ಡೌನ್ಲೋಡು ಆಗುವಷ್ಟರಲ್ಲೇ ಕ್ಯಾಸೆಟ್ಟು ಓಡಿರುತ್ತದೆ
ಇಮೇಜು ಓಪನ್ ಆಗುವಷ್ಟರಲ್ಲೇ ಹುಬ್ಬು ಹಣೆಸೇರಿರುತ್ತದೆ

ಇನ್ನು ಆ ಗ್ರೂಪುಗಳು.
ಗ್ರೂಪುಗಳು ಥೇಟು ಬಸ್ಸಿನಂತೆ ಬೇಡದಾಗ ದಂಡಿಯಾಗಿ ಬರುತ್ತಿರುತ್ತವೆ
ಅಪ್ಪಿ-ತಪ್ಪಿ ಏನೋ ಅರ್ಜಂಟಿದ್ದಾಗ ಮಾತ್ರ ಜಗತ್ತೇ ಖಾಲಿಯಾಗಿರುತ್ತದೆ
ಫ್ಯಾಮಿಲಿ-ಫ್ರೆಂಡ್ಸು-ಕಲೀಗ್ಸು-ಬಾಸು ಎಲ್ಲರಿಗೂ ಒಂದೊಂದು ಗ್ರೂಪು
ದಿನಗತಿಗೆ ತಕ್ಕಂತೆ ಮ್ಯೂಟ್ ಮೋಡು ಆನು-ಆಫು
ಈಗಷ್ಟೇ ಸ್ಮಾರ್ಟ್ ಆದ ಸೀನಿಯರ್ ಆಂಟಿ-ಅಂಕಲ್‍ಗಳೇನಕರಿಗೆ
ಫೋಟೋ-ವೀಡಿಯೋಗಳನು ಫಾರ್ವರ್ಡ್ ಮಾಡುವ ತೀಟೆ
ಅದಕೊಂದು ರಿಪ್ಲೈ ಮಾಡದಿದ್ದರೆ ಅಪ್ಪ-ಅಮ್ಮನ ಗಲಾಟೆ
ಎಷ್ಟೋ ಸಲ ಸಾಕೆಂದು ವಾಟ್ಸಾಪು ಅನ್‍ಇನ್‍ಸ್ಟಾಲ್ ಮಾಡಿದ್ದಿದೆ
ಆಮೇಲೆ ಎಲ್ಲರಿಗೂ ವಿಷಯ ತಿಳಿಸಲು ಮತ್ತೆ ಡೌನ್‍ಲೋಡ್ ಮಾಡಿದ್ದಿದೆ

ಅಂತೂ ಬದುಕು ನಡೆಯುತ್ತಿದೆ ಪೇಟಿಎಮ್ಮು-ಸ್ವಿಗ್ಗೀ-ವಾಟ್ಸಪ್ಪಿನ ಕೃಪೆಯಿಂದ
ಫೋನ್-ಸ್ಮಾರ್ಟಾದಷ್ಟೂ ತಲೆತುಕ್ಕು ಹಿಡಿಯುತಿದೆಯೋ ಎಂಬ ಅನುಮಾನ ನಿನ್ನೆಯಿಂದ ಕಾಡುತಿದೆ.
-ಚಿನ್ಮಯ
16/11/2017